Gweithgor Dyffryn Aeron

Prynu ffatri gaws Felin-fach (ffilm)

owen — Wed, 27 May 2009 18:19:49 +0000

Bywyd Newydd i Safle Ffatri Gaws

owen — Tue, 26 May 2009 13:08:24 +0000

Cafwyd hwb economaidd sylweddol i ganol Ceredigion wrth i gwmni lleol gyhoeddi ei fod wedi prynu ffatri gaws Aeron Valley Cheese wnaeth gau ym mis Mawrth 2007. Bwriad cwmni D. Jenkins a’i fab yw rhannu’r safle yn unedau llai o faint, a chydweithio gyda Gweithgor Dyffryn Aeron i ddenu busnesau i’r safle. Yn ystod y misoedd diwethaf mae nifer o gwmnïau wedi dangos diddordeb mewn adleoli a datblygu ar y safle. Nawr fod y pryniant wedi’i gwblhau mae sicrwydd y bydd yr hen ffatri gaws yn ganolfan gynhyrchu a chyflogaeth unwaith eto yn y dyfodol agos.

Ffatri Aeron Valley Cheese

Daw’r newyddion wedi gwaith ymchwil manwl gan Weithgor Dyffryn Aeron i ddatblygu cynllun busnes newydd ar gyfer safle Aeron Valley Cheese, a thrafodaethau rhwng y grŵp a nifer o gwmnïau sydd â diddordeb mewn ehangu yn Nyffryn Aeron. Cafodd y gwaith hwn gefnogaeth Llywodraeth Cymru’n Un, ac yn eu tro mae Elin Jones (y Gweinidog Cefn Gwlad), a Ieuan Wyn Jones (Dirprwy Brif Weinidog Cymru) wedi ymweld â Dyffryn Aeron i glywed a chefnogi syniadau’r Gweithgor.

Ry’n ni’n edrych ymlaen yn fawr iawn i gael cyd-weithio gyda chwmni Donald Jenkins a’i fab i ddatblygu gwaith ar y safle. Mae Brian Jenkins yn aelod o Weithgor Dyffryn Aeron, ac mae ganddo ef a chyfarwyddwyr y Gweithgor syniadau cyffrous iawn am sut allwn ni symud ymlaen gyda’n gilydd, a helpu ein gilydd i greu swyddi newydd yn yr ardal.
Huw McConochie, Cadeirydd Gweithgor Dyffryn Aeron

Y stori ar: Golwg 360 | BBC Cymru’r Byd | BBC Where I Live | Datganiad GDA

Felinfach cheese factory sold (ffilm)

owen — Mon, 25 May 2009 18:32:29 +0000

GDA yn croesawu Cyhoeddiad Dairygold

owen — Fri, 25 Jul 2008 14:18:01 +0000

Gorffennaf 2008: Mae cyhoeddiad Ieuan Wyn Jones fod Cwmni Dairygold wedi cytuno i ad-dalu swm o £600,000 oedd yn ddyledus ganddynt i Lywodraeth Cynulliad Cymru wedi cael ei groesawu’n fawr gan Weithgor Dyffryn Aeron. Daw’r newyddion wedi brwydr hir gan y gymuned leol am gyfiawnder yn dilyn cau ffatri bacio caws Dairygold yn Ebrill 2006, a symud peiriannau dalwyd amdanyn nhw ag arian cyhoeddus oddi yno.

Mae stori Dairygold wedi bod yn y newyddion yn gyson oherwydd bob criw bach o Ddyffryn Aeron, yn bobl ifanc yn bennaf, wedi mynnu nad oedd y stori’n cael ei hanghofio.

Roedd stori Dairygold wedi mynd yn dawel nes i grwp bach o bobl ifanc lwyfannu’r ddrama Drwg yn y Caws yn Theatr Felin-fach ym mis Medi 2006. Ymatebodd y gynulleidfa i’r ddrama trwy fynd ar eu hunion i safle’r ffatri wag a cherdded o’i chwmpas mewn protest – gweithred a ddenodd sylw’r wasg genedlaethol. Ar unwaith, cyhoeddodd y gweinidog Materion Gwledig ar y pryd, Carwyn Jones, ei fod e am erlyn y cwmni.
Huw McConochie, Cadeirydd Gweithgor Dyffryn Aeron

Drwg yn y Caws yn Theatr Felinfach

Er nad yw Dyffryn Aeron yn mynd i elwa’n uniongyrchol o’r cyhoeddiad hwn, mae’n ddiwedd pennod boenus yn ein hanes, a’r gobaith nawr yw y bydd Dairygold yn gwerthu’r safle ac y caiff ei ddefnyddio eto ar gyfer cyflogi pobl leol.

Mae Llywodraeth Cymru’n Un yn parhau i gefnogi gwaith Gweithgor Dyffryn Aeron i ddod a swyddi newydd i’r ardal, gan greu model newydd a chyffrous o bartneriaeth rhwng llywodraeth a phobl sy’n rhoi’r grym nôl yn nwylo’r gymdogaeth leol.

Cymuned yn llygadu ffatri wag

owen — Fri, 09 May 2008 12:51:32 +0000

David Edwards a Gareth Evans o gwmni DWE Consulting yn paratoi i gychwyn ar y gwaith o asesu cyflwr adeiladau Aeron Valley Cheese, ffatri a fu’n wag ers blwyddyn a deufis bellach ac sy’n ganolbwynt i ymdrech Gweithgor Dyffryn Aeron i ddod a gwaith newydd i gefn gwlad Ceredigion. Mi fydd DWE yn cyflwyno adroddiad ar y posibiliadau o greu busnes newydd dan reolaeth leol gerbron y Gweithgor yn ystod mis Gorffennaf.

Gwybodaeth bellach wrth: Huw McConochie (07891 956736) / Owen Llywelyn (07813 795096) / Euros Lewis (07813 173155 – 01570 471328).

David Edwards a Gareth Evans

Dau Weinidog yn Nyffryn Aeron

owen — Fri, 09 Nov 2007 12:23:15 +0000

Ar Dachwedd 8, 2007 daeth Dirprwy Brif Weinidog Cymru, Ieuan Wyn Jones, a’r Gweinidog Cefn Gwlad, Elin Jones i Theatr Felin-fach i gwrdd ag aelodau Gweithgor Dyffryn Aeron a chynrychiolwyr o Gyngor Sir Ceredigion. Pwrpas y cyfarfod oedd trafod datblygu swyddi cynaliadwy yn yr ardal, a cheisio sicrhau perchnogaeth leol o asedau.

Tra’r oedd y broses araf o ffurfio llywodraeth glymblaid yn digwydd gan-bwyll-bach ym Mae Caerdydd, yng Ngheredigion roedd datblygiadau yn carlamu yn eu blaen. Roedd neithiwr yn gyfle i’r naill weinidog a’r llall, ynghyd â swyddogion Cyngor Sir Ceredigion, i ddala-lan â’r cynnydd sydd wedi’i wneud yn y dasg o sylweddoli swyddi newydd yn Nyffryn Aeron’ medd Huw. Mae’r cynnydd hynny yn cynnwys sefydlu perthynas â Lactalis McLelland, y cwmni sy’n berchen safle segur Aeron Valley Cheese, a datblygu rhestr fer o syniadau prosesu llaeth sydd â photensial i ychwanegu gwerth sylweddol at gynnyrch llaeth ffermwyr yr ardal.
Huw McConochie, Cadeirydd Gweithgor Dyffryn Aeron

Ar ddiwedd y ddwy awr o drafod yn Felin-fach, addawodd Ieuan Wyn Jones – yn rhinwedd ei swydd yn Weinidog Datblygu Economaidd – gefnogaeth lawn i gais am arian o’r Cynulliad i gomisiynu astudiaeth dichonolrwydd drylwyr a fydd yn brawf ar syniadau’r Gweithgor.

Mae cael cefnogaeth y gweinidog Datblygu Economaidd a’r gweinidog Cefn Gwlad yn galondid mawr. Mae cyfran uchel iawn o gyfarwyddwyr y Gweithgor yn bobol ifainc dan 30 mlwydd oed ac mi fydd cael cefnogaeth o’r lefel hon yn hwb sylweddol i’w hyder. Dy’ ni ddim wedi mynd at y Cynulliad fel cardotwyr. Yn dilyn ein profiadau diflas wrth law cwmniau rhyngwladol, mae’r gymdogaeth Gymraeg a gwledig hon bellach wedi penderfynu cymryd cyfrifoldeb dros ei dyfodol ei hunan. Yn sgil cyfarfod neithiwr, byddwn yn camu yn ein blaen yn hyderus gan wybod fod llywodraeth Cymru’n Un yn gefnogol i’n gwaith.
Huw McConochie, Cadeirydd Gweithgor Dyffryn Aeron

Dau Weinidog yn Nyffryn Aeron | Taskforce meeting over dairy jobs

Y Cwmni

owen — Thu, 20 Sep 2007 11:58:58 +0000

Gweithgor Dyffryn Aeron Cyf
Cwmni Cyfyngedig Preifat

Rhif Cwmni 6374479

Cyfarwyddwyr: Huw McConochie, Euros Lewis, Owen Llywelyn, Alwen Jones, Carys Williams, Emyr Evans, Aeron Jenkins, Arwel Davies, Irfon Jenkins, Gerallt Owen

Corfforwyd dan Ddeddf Cwmniau 1985 fel cwmni preifat , 18fed Medi, 2007.

Carwyn Jones yn addo tasglu i Ddyffryn Aeron

owen — Thu, 12 Apr 2007 17:33:05 +0000

Sefydlu tasglu i Ddyffryn Aeron. Dyna’r addewid a roddodd Carwyn Jones, y gweinidog dros Amaeth a Materion Gwledig, i ddirprwyaeth o Geredigion yng Nghaerdydd, yr wythnos diwehaf. Dan arweiniad y Cyng. Keith Evans, Arweinydd y Cyngor, a Bronwen Morgan, y Prif Weithredwr newydd, trosglwyddwyd neges i’r gweinidog a ddaeth yn uniongyrchol oddi wrth gyfarfod cyhoeddus a gynhaliwyd yn Theatr Felin-fach yn sgîl cau ffatri gaws Aeron Valley Cheese.

Ar ben rhestr Pwyntiau Gweithredu y cyfarfod cyhoeddus oedd yr angen i gomisiynu astudiaeth a fyddai’n asesu cryfderau amryw o syniadau ar gyfer cynnyrch newydd sy’n bosib eu datblygu yn hufenfa Felin-fach, cynnyrch a fyddai’n ychwanegu gwerth at laeth lleol. Roedd ymateb y gweinidog yn gadarnhaol gan ddweud ei fod e am alw cyfarfod ynghyd yn Theatr Felin-fach, rywbryd cyn diwedd ms Mai, er dechrau edrych o ddifri ar yr hyn sy’n bosibl – cam dwi’n ei groesawu’n galonog.
Cynghorydd Owen Llywelyn, aelod o’r grwp o 7 a gyfarfu â’r gweinidog.

Er fod etholiadau Mai 3 yn ei gwneud hi’n amhosibl gosod dyddiad pendant yn y calendar, mae swyddogion y Cynulliad yn Swyddfa Ranbarthol Aberystwyth wedi cadarnhau fod trefniadau ar gyfer galw’r cyfarfod hwn eisoes ar y gweill.

Ry’ ni’n falch iawn o dderbyn y cadarnhad hwn o’r ffaith fod Llywodraeth y Cynulliad wedi cychwyn y broses o ddatblygu potensial arbennig yr hufenfa hon yn Nyffryn Aeron. O ganlyniad, mi fydd creu cyfleoedd gwaith newydd i’r 44 o weithwyr a ddiswyddwyd yn ddiweddar a gwneud y gore o’u harbenigedd prosesu llaeth yn flaenoriaeth i’r sawl a fydd yn eistedd yng nghadair y gweinidog ar Fai 4.
Euros Lewis, cynrychiolydd Gweithgor Dyffryn Aeron yn y cyfarfod gyda’r gweinidog.

Mae Gweithgor Dyffryn Aeron yn cytuno bod hi’n bosib – â pharhad cymorth Cyngor Sir Ceredigion a’r Cynulliad Cenedlaethol – i ddod o hyd i atebion cadarnhaol a fydd, yn y tymor hir, yn cryfhau sefyllfa brosesu a chynhyrchu llaeth yng Nghereigion.

Mae ‘na gonsensws cryf o fewn Dyffryn Aeron: os y’n ni am sicrhau dyfodol ffynianus i’r cymunedau gweldig Cymraeg hyn, mae’n rhaid i ni gymryd rheolaeth o’r sefyllfa. Rhaid i ni gydweithio a rhagweithio.
Euros Lewis, Gweithgor Dyffryn Aeron.

Dwy Ffatri, Un Gymuned

owen — Wed, 21 Mar 2007 19:16:33 +0000

Cynhaliwyd cyfarfod Dwy Ffatri, Un Gymuned ar Nos Fawrth, Mawrth 20, yn Theatr Felin-fach. Ymhlith y siaradwyr yr oedd cynrychiolwyr ffatri gaws Dyffryn Aeron, y ddwy undeb amaethyddol yng Nghymru, Cyngor Sir Ceredigion, AC Ceredigion Elin Jones, Llaeth Cymreig ac ymgynghorwyr llaeth annibynnol.

Yn ystod y cyfarfod hwn datblygwyd strategaeth ar gyfer adfywio Dyffryn Aeron sydd wedi derbyn dwy ergyd drom yn ddiweddar. Bydd y strategaeth hon yn cael ei thrafod gyda’r Gweinidog dros Amaeth a Materion Gwledig, Carwyn Jones, pan fydd cynrychiolwyr o’r cyfarfod Dwy Ffatri, Un Gymuned yn mynd i gwrdd ag ef y mis nesaf.

Yn ystod y cyfarfod hwn hefyd y cafodd Gweithgor Dyffryn Aeron ei sefydlu.

BBC Cymru’r Byd | BBC Where I Live

Dwy Ffatri, Un Gymuned

Cyfarfod â Carwyn Jones

owen — Wed, 29 Nov 2006 13:54:50 +0000

Ar 29 Tachwedd 2006 cyfarfu Cyfarwyddwr a Chynhyrchydd Sioe Drwg yn Caws, Euros Lewis, ac un o actorion y sioe, Owen Llywelyn, â’r Gweinidog Materion Gwledig Carwyn Jones i drafod dyfodol y ffatri wag yn Nyffryn Aeron.

Pwysleisiodd cynrychiolwyr Drwg yn y Caws bod gweithred Dairygold wrth gymryd yr arian, a gadael gyda’r peiriannau newydd sbon, yn amlwg yn un anghyfreithlon ac anghyfiawn oedd yn groes i gyfraith Gymreig ac Ewropeaidd.

Cyflwyno anfoneb i Carwyn Jones ar ran pobl Ceredigion

Wrth ateb dywedodd Carwyn Jones fwy nag unwaith y byddai Llywodraeth Cynulliad Cymru’n barod i fynd i’r eithaf i sicrhau bod y grant yn cael ei ad-dalu. Dywedodd hefyd nad oedd unrhyw berygl y byddai’r Cynulliad yn gadael y mater hwn heb ei ddatrys, ac awgrymodd y bydd datganiad swyddogol gan Lywodraeth Cynulliad Cymru o fewn y mis.

Bu’r cynrychiolwyr o Felin-fach hefyd yn trafod dyfodol y safle gyda Carwyn Jones, gan gynnig modelau ar gyfer ei ddatblygu er lles y gymuned leol, ac er mwyn hybu busnesau lleol. Roedd y modelau hyn yn cynnwys cynigion pendant, gan gynnwys bod y safle’n cael ei brynu gan Lywodraeth Cynulliad Cymru a’i rentu mewn adrannau llai i fusnesau lleol. Roedd cynnig arall gan y grŵp hefyd yn edrych ar berchnogaeth gydweithredol gan grŵp lleol.

Daeth yn amlwg na fedrai Carwyn Jones ymateb i’r gofynion hyn yn gyhoeddus tra bod cyfreitha rhwng Dairygold a’r Cynulliad, ond roedd ganddo ddiddordeb mawr ynddyn nhw fel ffordd bosib o ddatblygu’r safle yn Felin-fach.

Elin Jones yn cefnogi ymgyrch pobl Dyffryn Aeron